政情：甘威一支公煲碟過中秋

林健鋒食月餅忌膽固醇

經濟動力議員林健鋒（Jeffrey）嘅節目就精彩得多，尋晚同家人先到爸爸屋企坐吓，然後一齊外出食飯，當然有帶備月餅應節啦！Jeffrey話，自己好鍾意食蛋黃月餅，按目前身體狀況仲頂得順啲膽固醇，話每次逐少逐少食應該無問題喎。同樣來自工商界家嘅自由黨田北辰，尋日下午仲要到青衣參加黨友活動，夜晚先至趕返屋企同家人食飯過節。

久違了嘅前立法會議員「莎姐」周梁淑怡，尋晚就同丈夫周明權、大女智美、細女智琪、三個外孫、以及妹妹等人去媽咪屋企，四代同堂一齊食飯過節，莎姐同妹妹仲親自下廚，特別煮一味清淡嘅「清蒸肉餅」孝敬媽咪。周明權都好有外母心，早前已經送定啲蛋黃蓮蓉月餅畀外母，雖然蛋黃膽固醇高對老人家唔係咁好，但佢話淺嘗應該無乜問題。

林健鋒一家外出食飯過中秋。 （何偉鴻攝）

周明權好有心，早前已送定月餅畀外母。