政情：黃成智偷襲鄭家富出師不利

白鴿黨喺新界東本來有三席，即「卿姐」劉慧卿、鄭家富同黃成智，鄭家富盤據大埔、沙田同西貢，黃成智以北區為根據地，再加部分大埔區域，雙方一向唔啱嘴形，早有宿怨，○八年選舉時兩邊參選團隊更互相指摘對方越區拉票，哥親弟親唔及選票親。而尋日嘅一場東隧加價抽水暗戰，正係雙方暗鬥嘅延續。

新東變陣 力爭四席

港府證實收到東隧申請加價，車主同搵食車主罵聲四起，政黨當然群起抽水，為二○一二年立法會直選儲定彈藥，其中黃成智搶閘喺朝早十點半發出採訪通知，約傳媒十一點半喺立法會記者室開記招，但可能時間太倉促，或者叫座力唔夠，唔少報館都無派人捧場，電子傳媒更加基於「有大食大」原則，早早報道立法會交通事務委員會副主席鄭家富嘅批評，而黃成智嘅記者會，直至下午先至出到街，執輸行頭。

今次白鴿黨兩個前黨友明爭暗鬥，絕非偶然事件，事關佢哋票源相近，一二年若然兵戎相見，互噬廝殺勢所難免，白鴿黨早已部署食埋鄭家富個位。例如白鴿黨直選布陣向來採用「Ｎ＋１」政策，即由當區現任議員（Ｎ）加一名新人上陣，鄭家富退黨，白鴿黨現任新東議員得番卿姐同黃成智兩人，一二年應該只派三人參選，但據聞白鴿黨已經變陣，新東特別改為「Ｎ＋２」，即係維持搶奪四個議席嘅目標，咁仲唔係吼住鄭家富個位？

消息分析，投入律師生意搵真銀嘅鄭家富，兩年後未必再選，即使再玩，白鴿黨估計，鄭家富一半選票屬於白鴿黨，所以黃成智一心要搶埋佢啲票，現已接手鄭家富以前黨內交通同人力勞工兩瓣政策發言人嘅工作，除咗確保自己成功連任，仲希望帶挈多年好友狄志遠或卿姐嘅愛將李永成雙雙出選。尋日黃成智主動出擊，召集傳媒評論東隧加價事件，擺明想截鄭家富胡，兩人嘅角力戰勢所難免。