中環出更：阿爸捐身家 方文雄唔mind
時興講捐身家，香江富豪唔算孤寒，福布斯富豪方潤華公子方文雄（David）尋日宣布成立專業組織香江聚賢，都被人追問會否捐身家。David拍心口話，如果爸爸有意瞓身捐錢，佢無異議，因為啲錢唔係佢嘅。但不忘補充一句：「捐錢係講心意，唔係鬥身家」，似乎暗寸外國富豪借捐錢造勢。
香江聚賢宣布開張大吉，尋日喺中環大會堂舉行第一屆執委就職，請嚟政商界名人省招牌，行政會議召集人梁振英都有份科水，做埋榮譽贊助人。David以主席身份報喜話會員人數已達三百人，成員來自港島區一班中產及工商專業人士，希望明年收夠一千人喎。
咁成立目的係乜？David分析話，放眼世界，營商環境唔易，皆因日本表現霸道，美國貿易保護主義又抬頭，要殺出血路，就要團結工商力量，返內地尋找商機，嚟緊好快會組團北上考察，總之有錢齊齊搵。
David有個超級富豪爸爸，身家超過七十億元，牽頭搵商機，優勢當然比人強。但佢謙稱唔係富豪，笑言身家都屬爸爸所有，只要老竇認為捐得開心就得。咁識諗，方伯伯應該飲得杯落嘞。
香江聚賢多猛人夠「食力」
香江聚賢雖然講明唔帶貴族色彩，不過睇番份組織架構名單，的確有唔少猛人撐場，包括同係福布斯富豪嘅中華總商會長蔡冠深擔任名譽會長；中總榮譽會長霍震寰同全國政協常委陳永棋就係榮譽顧問，「食力」唔嘢少。
就職禮上，多位立法會議員包括何鍾泰、石禮謙及林健鋒（Jeffrey）都嚟恭賀。Jeffrey力sell同香江聚賢係老友記，但問佢會否入會，Jeffrey答得有保留:「要了解多啲先!」佢自己有個工商專業政改動力，將來有活動，可以一齊合作喎。