政情：梁栢賢面試醫管局CEO
醫管局尋日開始面試揀蟀，挑選繼任人，接替下月離任嘅行政總裁蘇利民。被視為大熱人選嘅醫管局質素及安全總監梁栢賢（PY），尋日已經做咗面試，據聞佢為今次面試出盡力做到最好，似乎志在必得。上月底處理完馬尼拉「8‧23慘案」傷者醫療善後嘅佢，上星期陪咗寶貝女兒飛去英國開學，返香港無幾耐，就要準備面試。呢排公私兩頭忙，PY面試完終於放下心頭大石，可以好好休息吓喇。
今次行政總裁一職，據聞係四人之爭，除咗PY同聯網服務總監張偉麟有主場之利外，獵頭公司亦分別喺英國同澳洲搵咗兩位猛人過江挑戰。雖然外界都視人緣好、公共衞生經驗足嘅PY為大熱之選，加上又盛傳醫管局今次想搵本地薑，同聲同氣管理醫管局五萬幾名員工，不過一日未公布人選，一日都未知花落誰家，大家不妨拭目以待。