夢九惡鬥披着羊皮的狼
愈戰愈勇嘅美國男籃「夢九」淘汰俄羅斯後，四強將遇上「巨人殺手」立陶宛，相信亦係「夢九」真正嘅考牌戰。立陶宛今屆走低調路線，先後贏過兩支世界冠軍西班牙及阿根廷，唔聲唔聲嚇你一驚！事實上，唔少球隊都因為睇低立陶宛，稍為輕敵而招敗，美國「夢幻隊」如果自視太高，立陶宛再爆都唔出奇。（有線62台及202台周日凌晨零時直播）
立軍連挫兩支世界冠軍
今屆扮豬食老虎嘅立陶宛，尋日八強面對另一勁旅阿根廷，更一度領先30分，最終大炒對手104比85，一面倒比分令人大跌眼鏡。立陶宛最強武器依然係極具效率嘅整體打法，多位主力均具備得分力下，今場多達七位球員獲雙位數字得分。領袖基利沙續有好表現，貢獻17分及9個籃板，至於甚有杜蘭特影子嘅積沙迪斯，亦攻入19分，其中三分球7射4中，手風順暢。
K教練警告勿輕敵
立陶宛冇星級球員，整體打法往往令人防不勝防，難怪教練甘素拉賽後都大讚球隊勝在團結：「立陶宛只係一個小國家，資源未必足夠，但亦因為咁令球隊非常團結，培養出永不放棄嘅精神，呢個就係我哋嘅勝利元素。」立陶宛已先後揮低西班牙及阿根廷，現時球員都充滿信心，而且走到四強已超額完成，面對美國「夢幻隊」根本毫無包袱。
「夢九」同日亦以89比79輕勝俄羅斯，不過球隊喺上半場一度受制於俄軍嘅強硬內線，欠缺高度嘅弱點表露無遺，今晚有可能再被立陶宛攻擊弱點。K教練賽前就警告球員，「夢九」並非天下無敵，絕對有輸波嘅可能性，所以當前最緊要係唔好輕敵。
本報綜合報道