前金融管理局總裁任志剛又有新差事，今次係做上市公司德昌電機嘅獨立非執行董事，嚟緊三十日就上任，任期兩年，尋日大市插水，但德昌電機公布呢個任命之後，股價就逆市上升，最高升咗百分之八，收市都仲升百分之三點三一，任總效應明顯不過。
退休一年，任總前前後後接咗六、七份差事，佢舊年退休時話要學點hea，依家睇嚟都唔使學囉。德昌電機尋日發表嘅通告透明度十足，將任總做呢份工嘅待遇全面曝光，如每年可以袋董事袍金兩萬美元，工作內容係參加兩次董事局全體會議，之後每參加多一次會議，就可以多五千美元額外袍金，此外，每年仲可以得到相當於六千美元嘅公司股份。
任總家吓學術界同商界兩忙，身兼包括中國金融學會執行副會長、中大全球經濟與金融研究所傑出研究員，仲係江湖地位十足嘅中國投資有限公司嘅諮詢委員。商務方面，又做咗建設銀行獨立非執董，同鼎鼎大名嘅瑞士銀行非執董，依家又接埋德昌電機嘅聘書，盡顯其江湖地位。
