政情：查太擬設大學教師獎
大學教育資助委員會（ＵＧＣ）尋日舉辦晚宴，宴請由八大院校內部選出嘅卓越教師，咁難得嘅盛事，八大院校校長梗要畀面出席，近一百五十人聚首一堂，氣氛好熱鬧。教資會主席查史美倫（Laura）宣布一項令人雀躍嘅消息，話ＵＧＣ正籌備緊一個卓越教學獎，頒畀傑出大學教師。
依家政府有關部門都有向中小學教師頒發卓越教學獎，表揚佢哋嘅教學成績，唯獨大學教師一直未有全港性獎項，只由八間院校各自頒畀自己嘅教職員。今年ＵＧＣ首次宴請八大院校內部選出嘅卓越教師，又公布將設立大學界別嘅卓越教師獎，難怪大家咁興奮。
Laura話，設立呢個獎項係想帶出一個強烈訊息，就係ＵＧＣ將以卓越教師為榮，希望形成一個菁英教師嘅網絡，塑造一個卓越教學文化。ＵＧＣ已成立小組落實有關設想，負責遴選最合適人選，但暫時未有正式推出時間表。至於咩教師最有希望當選呢？Laura就話，教本科叻唔係最重要，反而要對教學文化有貢獻，各位講師、教授們應該收到喇！