政情：陳振彬度橋 打救青年廣場
港府豪擲七億喺柴灣打造嘅青年廣場，由於位置唔就腳，宣傳又不足，如果唔係早前有「八十後」喺嗰度掟鞋示威，同埋黃栢高（Paco）等食家喺度開食肆，相信到依家大家都未必知道有座咁嘅嘢。港府有見及此，尋日就急急委任多五名青年廣場管理諮詢委員會委員救亡；本身係委員嘅青年事務委員會主席陳振彬仲揚言已經度定好P:橋令廣場起死回生添！
港府尋日委任咗香港青年聯會副主席鄭重科等五個新委員加入青年廣場管理諮詢委員會，任期由即日起至一一年尾，似乎想打救無乜起色嘅青年廣場。本身係委員嘅青年事務委員會主席陳振彬（Bunny），尋日就幫廣場解畫，話現時嘅使用率已有改善，酒店旅舍入住率有八成半之餘，寫字樓租用率更爆晒棚。
Bunny又揚言嚟緊會搞搞新意思，年尾會將「全球華人新秀大賽」呢啲咁受追捧嘅節目破格移師去青年廣場舉行，又會安排夠晒young嘅新世紀青年管弦樂團嚟表演，佢話有信心可以俘虜到班「八十後」，大家且看Bunny如何扭轉亁坤。