鬍鬚曾喺網誌大談台灣行嘅「收穫」，就係收到台中市市長胡志強嘅幾袋土產美食，而佢就帶咗本地設計師陳幼堅嘅茶具去台灣送禮，仲話「『住好啲』創辦人楊學德亦提供不少好東西」，有銅片金魚掛飾、酒塞同「雙喜」書籤咁。「住好啲」係本地著名創意家居用品品牌，創辦人係楊志超，兩年前因「拾肆Ｋ」字樣T恤風波而人氣高企，而楊學德係本地漫畫家，鬍鬚曾將兩人身份crossover，相當夠創意囉。
鬍鬚曾正身處北京，其跟大隊訪問上海嘅政治助理葉根銓將所有責任攬上身，回覆話鬍鬚曾本身認識楊志超，網誌首稿無寫錯楊嘅名，係職員其後手民之誤，將個名搞錯喎。總之鬍鬚曾訪台醜事連篇，網誌事件都算係為今次旅程畫上完美句號喇啩。