政情：霍泰輝腸胃不敵凍蟹
中大醫學院院長霍泰輝係兒科聖手，細蚊仔奇難雜症難佢唔倒，不過名醫都會中招，話說八月三十日晚出席醫學界賀梁智鴻醫生授勳晚宴後，霍院長竟然肚屙又肚痛，懷疑係食咗潮州凍蟹後敏感。
晚宴後兩日，霍院長喺中大一個活動上現身，佢話腸胃唔多妥，原來係兩日前飲完金刀梁嗰餐後，返屋企屙咗兩次，個胃谷住谷住，鬼咁唔舒服。
食咗乜？原來係嗰晚擦咗幾舊凍蟹，但霍院長事後問過其他賓客，無人有投訴。睇怕今次係個別事件，唔算係食物中毒，霍院長摸摸肚皮話：「可能係我個胃特別敏感喇。」所以話，名醫都唔係百毒不侵，夏天食生冷嘢，都係小心為妙。
呢排人人潮玩iPad，霍院長都買咗一部，用嚟睇醫學文獻同經典文學名著。近日迷上睇《三國演義》及《東周列國誌》，佢話古今當權者所犯嘅錯誤，幾乎喺呢兩部名著內搵到晒，以史為鑑，對調解辦公室政治好有幫助喎。