政情：李本瀅摑邱騰華一巴
暑假剛過，立法會雖然仲未正式開鑼，不過停車熄匙呢個議題就率先再「熱」過。猶記得暑假前熱死司機事件，搞到環境局局長邱騰華即時讓步，提出喺酷熱天氣下可豁免熄匙，仲要坐埋「熱狗巴」以圖平息各方非議。以為漸趨平靜，事件可望解決，點知尋日突然殺出個「程咬金」，直指將酷熱天氣警告同停車熄匙掛鈎，只會令情況變得複雜，反而建議倣效加拿大，根據車廂溫度執法仲好，言下之意即係話邱局長條橋唔得，怪不得搞到邱騰華下晝出席活動後騷都唔做，溜之則吉。
倡按車廂溫度作準則
呢位「程咬金」係邊位？之唔係現任天文台長李本瀅。其實歷屆天文台台長都係有碗話碗，有碟話碟，所以李本瀅尋日朝早接受電台訪問時，被問到近年天氣愈來愈熱，係咪應該將酷熱天氣警告，作為豁免停車熄匙嘅參考指標時，就好坦率表達自己嘅意見，直指「唔係冇可能……只係將問題變得複雜」喎，仲反建議倣效加拿大，根據車廂溫度作為準則好啲。佢嘅理由好簡單：「車有錶顯示氣溫嘛。」佢仲補多句，各區氣溫數據始終唔同。
其實要理解台長何解咁講，絕對唔難，事關台長都講過，酷熱天氣警告主要基於風向、溫度、濕度同大部分人耐熱程度等因素釐定發出，好難同時顧及不同地區嘅車廂溫度及司機大佬嘅感受。不過台長此言一出，即係話統一用酷熱天氣警告作為停車熄匙嘅準則，係行唔通嘅，變相摑咗邱局長一巴！
唔知係咪因為李本瀅早上嘅言論刺痛邱局長嘅要害，邱騰華尋日下晝出席一個活動時，草草做完個儀式，連表演都唔睇，拋低同為主禮嘉賓嘅鄉議局主席劉皇發，急急腳走人，仲愈叫愈走，出動埋新聞官攔截記者，睇落都幾狼狽。
回顧整個停車熄匙立法過程，由司機大佬罷駛抗議，到局長親自坐「熱巴」焗桑拿，依家仲要畀第二個部門「掉轉槍頭」，都咪話唔一波三折。不過事情仲未完結，皆因「熱巴」之旅仲有第二次，時間已定於本星期四，主要去新界睇吓，暫時有四個地點，睇吓到時局長又點拆招？