政情：廣州迎亞運啟山瞓身支持
近排唔少名人二、三代又忙出海、又忙clubbing，其實佢哋都好workhard，好似霍家第三代接班人霍啟山咁，尋日見佢喉沙沙出席「智道跆拳迎亞運邀請賽2010」，不過佢唔係感冒，只係忙到聲沙啫。啟山做咗廣州巿政協委員後，當正廣州係另一個家，落力為宣傳廣州出謀獻策，好似尋日嗰個迎廣州亞運活動，佢幾攰都支持到底，坐足全程。
今日啟山做會長嘅香港小型足球總會亦有賽事，除咗係慶祝個會成立十周年，亦係另一個迎亞運活動，到時仲會有場香港對廣州賽事。有份落場嘅啟山話爸爸霍震霆會帶埋波鞋嚟，一於上陣不離父子兵。
除咗啟山，有份搞今次活動嘅香港青聯主席陳仲尼（Rock）都有嚟支持，今日就要上京出席新一屆全國青聯大會嘅阿Rock，係今屆全青副主席大熱，不過佢謙厚咁話，自己喺香港青聯做咗十年，由低做起，希望大家支持咁話。
講番個賽事，本身都係香港青聯中人嘅「香港智道總會」會長李永康，帶埋仔仔一齊嚟，李生係黑帶六段，佢話仔仔開始學咗幾個月，仲話用跆拳訓練小朋友紀律、自律同忍受最好不過。