政情：鄧國威閃縮送女放洋？
做得政府高官，話晒都有頭有面，又慣咗面對公眾及傳媒，點都唔應該閃閃縮縮，前社會福利署署長、現任勞工及福利局常任秘書長鄧國威，尋日就做咗反面教材，佢同疑似太太及兩個疑似女兒喺個教育展見到我哋，竟然即時雞飛狗走。本身係四眼一族嘅鄧國威，忙亂中仲急急戴多副太陽眼鏡，簡直係前廣播處長朱培慶上身；當日朱培慶情急之下匿埋喺艷女CoCo身後，好彩鄧國威未至於咁做。
事緣一連兩日嘅英國教育展尋日開幕，打算送仔女去英國留學嘅市民必然都會去睇睇，場面好熱鬧。點知我哋喺場內撞到一身便服打扮嘅鄧國威，佢當時同一個女士一齊，身邊仲有兩個十幾歲嘅少女，四個人一邊行一邊傾偈，十足十係一家人，佢哋喺場內打轉，仲問唔少攤位攞升學資料，似乎有人想出國留學。
疑似老婆九秒九彈開
我哋見鄧國威一行四人停低填資料，走上前問佢係咪打算送個女去英國讀書，專程嚟攞資料。點知鄧國威即時頭耷耷面露尷尬神色，一粒聲都唔出，佢身邊嗰位女士仲以九秒九速度彈開，快到我哋都唔知佢去咗邊。鄧國威跟住仲攞咗副太陽眼鏡出嚟，唔理自己已經戴住一副眼鏡，打孖上戴超走人。我哋見佢哋反應咁大都好愕然，即刻追出場外諗住問個明白；點知一出去就見到鄧國威企喺外面，離遠咁睇住我哋有冇追出嚟，一見到我哋即刻彈到九丈遠，連個教育展都唔睇提早走人。
我哋透過勞福局發言人，問鄧國威尋日係咪同太太女兒去教育展，係咪打算送個女去英國讀書。勞福局發言人回覆話鄧國威係去咗一個展覽；至於其他問題，就因涉及私人問題而唔答。
其實高官送仔女出國讀書都唔係新鮮事，一來佢哋對本地教育制度冇信心，二來有啲仲有政府津貼，好似政制及內地事務局局長林瑞麟，個女就喺英國讀書，就連當年掌管教育事務嘅前教育局局長李國章同前教育局常秘羅范椒芬，佢哋都送個仔出國，前保安局局長葉劉淑儀，仲一早送個女去美國讀中學，呢啲都係眾所周知嘅事。鄧國威今次嘅反應，會唔會過敏咗啲呢？
