政情：阿Paul榮歸蘇屋邨
難逃清拆命運嘅蘇屋邨有五十幾年歷史，不但見證本港公屋嘅歷史進程，亦充滿濃厚嘅鄰里人情味。早前有學者將唔少街坊、名人同學者喺蘇屋邨嘅成長片段輯錄成書，立法會議員謝偉俊都係一分子。阿Paul尋日衣錦還鄉，返老家蘇屋邨為新書簽名，好受一班老街坊歡迎，仲吸引近百人排隊等簽名，絕對同一眾攻陷書展嘅「o靚模」有得揮！
阿Paul尋日同佢「打令」白韻琹返故居同班老街坊敍舊，嘆謂自己雖已搬離蘇屋邨多年，但仍然懷念屋邨嘅空地，事關當年佢日日去空地踢波，連扭波都喺嗰度學喎！阿Paul由當年嘅黃毛小子，搖身成為今日嘅立法會議員，唔少老街坊都以佢為榮。尋日阿Paul「衣錦還鄉」，好多人爭相同佢合照攞簽名，有位婆婆仲話當年就住喺阿Paul隔籬，睇住佢大添喎。
白姐姐就大爆阿Paul媽媽當年唔想阿Paul同人講自己住過蘇屋邨，怕畀人睇唔起，但白姐姐就大讚蘇屋邨好住又涼爽，街坊鄰里應該自豪至係喎！