政情：長毛推百萬酬整容廣告
社民連立法會議員梁國雄（長毛）嘅長髮街頭鬥士形象深入民心，即使早幾年因為入獄而剪咗個冬菇頭，都無改變大家對佢嘅印象。長毛尋日上電台，透露早三、四年有廣告商曾經同佢接洽，想搵佢拍一個外國牌子洗頭水廣告，不過只係好初步接觸階段，最終不了了之。長毛仲話，相信愈來愈少人會搵佢拍廣告，一來佢拍嘅廣告入唔到內地市場，二來好多人覺得佢唔代表大多數香港人喎。
除咗洗頭水廣告，原來早幾年仲有人搵過佢拍纖體同整容廣告，出手一啲都唔低，開到成百萬咁多㗎。佢話最初都打算接拍呢個廣告，諗住再將啲錢捐畀當時成立無耐、經費捉襟見肘嘅社民連，最後因為社民連嘅經濟政策綱領上講明唔鼓勵人去纖體，加上一眾黨友反對，最終都係推咗。
長毛仲同大家分享護髮心得。佢話平日洗頭最快三分鐘搞掂，最慢都係五分鐘，得閒先會用護髮素，所以唔講得上有乜心得。佢仲再次重申，留長頭髮純粹自己鍾意，同政治無關；仲話有朝一日覺得麻煩嘅話，會毫不猶豫剪咗佢喎。