中環出更：KK點菜成金省靚食館招牌
每逢行過街頭街尾，總會搵到建築地盤欄杆寫上「金城營造」四隻大字，公司老闆正是全國政協委員、廣東社團總會主席王國強（KK）。KK嘅工程師形象深入民心，原來仲係酒家老闆，喺佐敦柯士甸道童軍中心經營會所式酒家「金陶軒」，只係開業初期如燒銀紙，曾經蝕本幾百萬元，經過逾八年奮戰，憑着不斷改良菜式，近年參加美食比賽屢獲殊榮，終於省靚「金陶軒」招牌！
KK話經營食肆開支不菲，加上開業初期頻頻蝕錢，一度想過放棄，但佢永不言棄嘅精神又點會咁易認輸吖。「我把心一橫，將酒家轉型走中高檔路線，深信只要菜式有水準，實有得做！」
自創菜式 屢獲殊榮
為咗菜式有水準，KK不時坐鎮金陶軒突擊試菜，食到唔合水準嘅菜式，二話不說打回頭，好似叉燒咁，佢直話直說：「啲叉燒起初太乾瘦，我叫師傅改為半肥瘦，乾噌噌邊好食呢！」所以今日嘅金陶軒嘅半肥瘦叉燒肉質軟嫩多汁，香味四溢，拍得住中環一啲會所嘅靚叉燒。
KK又下禁令，唔准師傅加味精，菜式要少鹽少油，盡量以健康為主。KK自己都食得清淡，佢以切碎蝦米、雞蛋絲加入米粉炒至乾爽，自創出一味「KK炒米」，惹味可口，無加入肉絲嘅炒米粉，一樣頂呱呱。
KK搞工程出神入化，估唔到仲精於「點餸成金」，一味「糖醋子薑骨」，去年就奪得「美食之最」豬肉組冠軍。呢味餸係以淮陽菜「糖醋排骨」為基礎再作變化，煮法是以豬肋骨配鎮江醋及秘製醬料烹調，火路恰到好處，外皮香脆，肉汁豐富，令人一咬難忘。另一味「麗影紅紗卷」，亦喺○四年勇奪「美食之最」牛肉組冠軍，以越南紙糯米包肥牛炸至金黃色，入口脆卜卜，嗒真啲又帶點煙韌，淋上牛肉碎粒製成嘅酸甜醬汁，起畫龍點睛作用。
金陶軒近年口碑不俗，立法會議員黃國健、行政會議成員鄭耀棠以及唔少中港兩地高官亦慕名而至，更成為KK自己嘅御用飯堂，無論廣東社團總會開會後聚餐，抑或家庭聚會都會幫襯。金陶軒採取會員制，街外人想幫襯的話，先填寫一份臨時入會表格，畀十元行政費就可以入座，收費比會員多付加一服務費，但仍是物有所值。
卓妮