中環出更：余黎青萍挽夫拍拖巡舖
可以白頭到老嘅青梅竹馬，喺依家呢個年頭真係少之又少，身為瑪利諾修院學校小學部校監嘅余黎青萍，下個月就同老公余其祥結婚三十八周年，不過歲月無偷走二人嘅恩愛，前兩日卓妮就喺中環見到佢哋兩公婆挽臂行街，之後仲一齊去巡舖，認真羨煞旁人！
情侶裝晒恩愛
前日中午一點左右，卓妮喺畢打街等過馬路，抬頭一望，見到余太企咗喺對面馬路，身旁仲有高大嘅余生，望真啲，佢哋兩個身上嘅Daks服裝襯晒色，雖然低調，但一睇就知係情侶裝。期間有幾滴雨粉灑落嚟，體貼嘅余生拿拿臨開遮幫太太擋雨，余太亦好小鳥依人咁翹實老公，甜到漏！等到佢哋過完馬路，卓妮上前打招呼，原來佢哋唔係淨係過嚟中環行行街，而係一齊嚟巡舖。
余生做開投資生意，多年前喺英國投資八位數字，與創辦專業美白牙齒中心施美妙（Smilestudio）嘅好友牙醫陳偉明合作，三年後就回本。佢哋中心採用有五項專利嘅鹼性美白牙齒啫喱，有別於坊間嘅酸性漂牙劑，對牙齒零負擔，加上藍光技術，令美白更見效，所以余生決定將呢項技術帶嚟香港，年前仲喺中環陸佑行開新店，依家喺全球有超過一百間專業中心，嚟緊仲會陸續喺內地開枝散葉。
余太出任副申訴專員多年，任期到今年四月中，本來佢諗住半退休，淨係繼續喺母校做義工，點知專員留佢服務，一個星期返三日，為同事搞英語研習交流講座，八月因為好多同事都放假，佢先有假放，所以一得閒就過嚟中環陪老公，食飯拍拖兼巡舖，絕對係夫唱婦隨！
卓妮