政情：陳有慶無懼曼谷炸死人
平靜咗一排嘅泰國首都曼谷，最近又多次發生炸彈爆炸，造成唔少人死傷，話口未完尋日又多一單。不過經常返泰國嘅亞洲金融集團董事長陳有慶，依然力撐泰國局勢冇問題，仲自爆佢啱啱先喺早前一宗爆炸發生之前由曼谷返港。
呢個星期三我哋喺一個酒會上撞到陳有慶，問佢係咪好耐冇返泰國，佢就氣定神閒咁話「唔係」，原來佢啱啱先喺曼谷返嚟！對於曼谷接連發生炸彈爆炸，佢自言從來未驚過，話嗰邊局勢冇乜嘢，近日市面仍然非常平靜。
陳有慶家族喺泰國有好多投資，經常穿梭泰港兩地，過時過節又例必全家返泰國同親朋戚友團聚。佢對家族發迹嘅泰國始終念念不忘，依家仲做緊香港泰國商會嘅顧問。陳有慶亦一向熱心公益，浸會大學啱啱宣布會喺嚟緊九月初嘅開學典禮上，頒授榮譽大學院士畀陳有慶等五位傑出社會人士，以表揚佢哋對社會作出嘅重大貢獻。