政情：五散人變身五反人

立法會審議《最低工資條例草案》，其中以勞工界力爭將政府倡議「兩年一檢」縮短為「一年一檢」嘅修訂案，爭持最為激烈，將辯論推向高潮。消息話，一直答應政府對「兩年一檢」投反對票嘅「五散人」三名成員，即廠商會林大輝、保險界陳健波同資訊科技界譚偉豪，喺投票前幾個鐘臨時轉軚，通知政府打算改變初衷，令政府一度大為緊張。

唔係奉旨保皇

聞說就喺踩通宵嘅當日晚上，勞工及福利局常任秘書長鄧國威喺立法會前廳，多次拉住林大輝等三人密斟，作最後游說，但點都搞唔掂三人，三人最終中間落墨，對「一年一檢」既唔支持，亦唔反對，走咗去附近茶餐廳食燒味。

睇番投票結果，「一年一檢」修訂案即使多咗林大輝三票，都仲爭兩票先至能闖關成功，但形勢驚險，政府抹一把汗。消息話，政府事前數票，計埋林大輝三人，十拿九穩，點知「五散人」臨到最後一刻先至變卦，政府即時陣腳慌亂，倒瀉籮蟹。經此一役，聽聞政府對「五散人」嘅「反叛」同立場「反覆」，產生好大戒心，仲私下稱呼佢哋做「五反人」，暗諷五人隨時「作反」，唔多靠得住。

「五散人」無端端多咗個新花名，相信佢哋唔會介意，觀乎五人近期表現，都係想同政府劃清界線，成為左右大局嘅中間力量，總之唔係奉旨撐政府。好似《最低工資條例草案》另一條由政府提出廢除行業委員會嘅修訂案，陳茂波擺明「倒戈」，投下反對票，加上專業會議梁美芬嗰張棄權票，令修訂案因兩票之差而遭否決。

此外，早前立法會表決政改方案嗰陣，林大輝喺發言中發炮指煲呔曾話推動民主要風雨同舟，呢隻舟其實只係政府同民主黨嘅雙人獨木舟，民建聯連船尾都摸唔到，獨立議員更只有喺岸上做啦啦隊份兒，成為建制派炮轟政府喺政改一役大細超嘅名句。「五散人」成日剃政府眼眉，無非想凸顯自己嘅中立角色，以後改名叫「五反人」，隱含同政府反面、反枱嘅意思，可以話係求仁得仁！