中環出更：猷啟運動裝甜蜜蜜等女友
去年生日同孖生家姐何超蓮一齊開咗個十八歲盛大生日會嘅賭王何鴻燊三房兒子何猷啟，今年十九歲生日無咩公開慶祝活動，不過前日（二十日）佢生日翌日，卓妮就喺置地撞到佢。聽住音樂嘅猷啟啱啱去完洗手間，着住件祖雲達斯龍門保方球衣，襯條白色籃球褲同跑鞋，咁sporty，唔通去做運動？
卓妮本來想上前同猷啟講聲「生日快樂」，不過見佢一個箭步就拐咗個彎、再大踏步行去隔籬中建大廈嘅HMV。行得咁急，仲以為佢約咗人添，不過見佢得一支公行去外國唱片區睇碟。睇咗無耐，見佢㩒㩒個電話，就即刻放低啲碟，搭電梯落去中建大廈嘅出口，一出門口佢就同一個長髮少女相視而笑，睇真啲，原來係佢女友Mina。
三太大讚斯文低調
猷啟跟手接過女友手上嘅兩個紙袋，再拖到實過馬路。哦﹗原來真係約咗佳人，頭先只係攝時間去睇碟，怪不得要行快兩步啦。佢哋兩口子有講有笑，一齊行過對面馬路，再齊齊上咗七人車鬆人。呢個三太口中嘅「荳芽夢」真係夠晒sweet！
作為猷啟嘅初戀情人，Mina外貌同出身經常被人看輕一線，不過猷啟就man到爆，今年一月戀情啱啱曝光，就即刻公開女友身份以正視聽；事隔半年，又要一個喺外國一個喺香港，但都無阻發展。對女友咁認真，難怪連三太都受感動，仲畀Mina做「屋企人」。
早排卓妮喺東華三院活動撞到三太，講開Mina成日畀人指指點點，三太即時大讚Mina斯文又夠低調，仲好樂意Mina多啲去佢哋屋企坐，等Mina習慣佢哋嘅屋企生活。三太話自己周身唔得閒，無可能成日喺度客客氣氣咁招呼Mina，所以希望Mina唔好當自己係外人。不過，三太咁開通都有條件，就係拍拖一定唔可以影響學業。見Mina上得佢哋何家車，就證明猷啟無令媽咪失望啦﹗
卓妮