中環出更：梁愛詩識歎頻換竇High Tea
置地廣場「Cafe Landmark」向來深受名人歡迎，約朋友歎茶傾偈確係唔錯選擇。不過，卓妮最近就發現唔少名人更上一層樓，轉移陣地到四樓間米芝蓮二星法國餐廳「L'ATELIER de Joel Robuchon」，早幾日遇過賭王四太梁安琪high tea後，前日下晝四點半又見到被封為「政治紅娘」嘅基本法委員會副主任梁愛詩，同兩位女性朋友喺度歎茶。
L'ATELIER de Joel Robuchon法國餐廳大部分餐枱均有柱位分隔，私隱度相對提高，食物亦好有水準，以簡約方法烹調頂級時令食材，保留原汁原味。L'ATELIER嘅下午茶都好講究，食物鋪排相當精緻，包括有魚生、蛋糕、雪糕等精美小食，每位二百九十八元，確係物有所值。其他招牌食品仲有牛角包，又有自家混合嘅獨有咖啡，難怪咁多人幫襯。
詩姐可以話係中環地膽，卓妮過去大半年先後喺太子大廈、歷山大廈及置地廣場一帶遇過詩姐好幾次，最近見佢去歷山大廈COVA歎茶，再到太子大廈La Maison Du Chocolat買朱古力，上月初就去幫襯法國銀器餐具殿堂級品牌Christofle。去年十一月中，卓妮仲見過詩姐幫襯太子大廈間丹麥百年名牌首飾Georg Jensen買首飾添。
卓妮