政情：大輝公開表忠露骨
立法會廠商會代表林大輝曾經喺政務司司長唐英年（唐唐）家族嘅半島針織位至董事總經理，早有唐唐「家臣」嘅稱號，佢早前喺自己本立法會通訊，毫不避嫌咁捧唐唐做政改功臣，令人為之側目。尋日大輝更加借立法會審議最低工資草案，又趁機公開表忠，話一世人只打過一份工，夠晒忠心，仲好露骨添！
立法會尋日續議最低工資，保險界陳健波發言支持，指自己打工三十六年，只有過兩個僱主，反映打工仔都有忠心族，老闆畀高啲人工都值得。一樣受過人二分四嘅大輝，其後發言時爭做忠僕，話成世人只打過一份工，自詡比陳健波更忠心，又話打工仔都有盡忠職守者，「就好似我咁」。大家聽到，想唔信佢對唐家忠心不二都唔得。
大輝喺最新一期立法會通訊，揀用唐唐嘅單頭相做封面，襯以「政改方案‧締造歷史」標題，已經被人話有心幫疑似特首候選人唐唐造勢，「忠僕」角色深入民心，尋日再公開表忠，真係夠晒露骨！