中環出更：項明生遊歷豐富人生

遭俄警「打劫」 遇恐襲寫遺書

James話咁鍾意旅遊，係要補償兒時夢想，因為自幼喺四川長大，生活條件有限，只好睇旅遊書止渴，但來港升讀港大後，開始人生停不了嘅旅遊夢，至今踏足的國家多達五十八個。數最難忘旅遊經歷，James不假思索話，喺俄國被警察當街當巷問攞錢，形同「打劫」；又試過喺斯里蘭卡遇上恐怖襲擊，匿埋喺酒店寫定遺書，幾乎客死異鄉。James話：「闖蕩多年，總算無損手爛腳，最倒楣經歷，莫過於喺印度食錯嘢，屙足半個月。」不過，旅遊亦帶來好多樂趣和愉快經歷。

遊伊朗，男女授受不親，遑論與遊客拍照，但偏偏靚女多。James話，佢喺伊朗好受當地女學生歡迎，皆因韓劇喺伊朗好受歡迎，大家當咗佢係韓國明星，所以好多女學生主動要求同佢合照。

出門多，James有自己嘅救命錦囊：「一定要帶美金傍身，無論去到世界邊個角落，美金仲係最通行！」其次，錢要分開袋，仲要帶定一、二個金幣，必要時用嚟同當地人交換生活物資，因為有啲地方太落後，連紙幣都唔收喎。James屋企仲有十幾個銀包，分別袋住多個國家嘅錢幣，內附有各國會員卡、積分卡、地鐵卡、的士電召片、當地朋友電話等，方便隨時出發都唔使騰雞。

James最近自資十萬元出咗本新書《足足五千年》，同大家分享旅遊見聞，稍後喺書展中參展，既有實體書，亦有電子書，收益撥捐前財爺梁錦松及太太「跳水王后」伏明霞搞嘅「小母牛」基金，協助內地貧困家庭自力更生，早前合和實業太子爺胡文新就捐咗三十萬元買James本新書，認真夠老友！

伊朗	古巴	項明生將唔同國家貨幣分別放喺多個銀包，隨時拎起就行得。

卓妮