政情：梁卓偉「捐軀」慳龕位
骨灰龕位供不應求，食物及衞生局副局長梁卓偉尋日出席九龍城區議會傾骨灰龕政策時，強調自己會身體力行，死咗都唔會佔用骨灰龕位！何解？原來佢已經簽咗器官捐贈卡，死咗之後會捐晒啲有用嘅器官，連條屍都會捐埋畀港大醫學院解剖咁話。認真係物盡其用，仲慳番一個龕位添。
今次梁卓偉自爆簽咗器官捐贈卡，希望借呢個機會呼籲多啲市民一齊簽。佢又話自己唔食煙、少飲酒，死咗之後應該有好多器官仲有用，好似五臟六腑同對眼都可以捐晒。佢仲唔怕忌諱，話自己條屍捐晒啲器官之後應該都「無咩淨」，但都會捐埋畀港大醫學院用作解剖，「解剖完應該都會變到溶溶爛爛㗎啦」！
講開港大，原來梁卓偉同港大好有淵源，喺一九九九年至二○○八年間，一直喺港大做公共衞生及社會醫學教授，屈指一算有十年光景，難怪對港大特別有感情。