政情：林超英演講 大晒韓語
自言處於「退休過度活躍期」嘅前天文台台長林超英尋日繼續佢嘅「外賣」旅程，向一班打算參加台、韓、港三地環保交流團嘅初中生演講。唔好以為林超英淨係講氣象、講環保在行，原來佢對外語都有一手，喺班學生面前演繹「你好」、「多謝」嘅普通話同韓語版，左一句「晏囉哈些唷」（你好）、右一句「琴沙堪咪打」（多謝），相當順口！
話說有團體嚟緊舉辦三日兩夜嘅台、韓、港三地環保交流團，尋日舉行揭幕禮，請咗林超英做主禮嘉賓兼演講。面對百幾位初中生，佢有感而發話，香港後生仔諗嘢係好快、識好多嘢，但對比台灣嘅學生，就未學識點生活，暗示香港學生對環境保育唔太重視。
林超英即時提點幾招畀學生。話晒係交流團，佢提醒學生要有禮貌，就算語言唔同，至少有幾句傍身表示善意，隨即教「你好」、「多謝」嘅韓文同普通話點講，差在未講埋台語。話時話，舊年退休嘅林超英，講過退休後都要不斷增值，唔知係咪咁，揀咗唔算易學嘅韓文研究吓？