政情：郭永亮曾智雄玩iPad晒幸福
香港青年聯會前日改選，見一班青年才俊好貼近潮流，除咗用iPhone外，仲加入埋iPad大軍。升呢做青聯副秘書長嘅許晉亨外甥郭永亮（Andy）同全國青聯副主席曾智雄，不約而同帶咗部潮物iPad到場。Andy用iPad相片功能，同大家一齊睇佢兩個月大嘅囝囝，成副慈父樣；智雄就同大家重溫與太太喺新疆拍攝嘅結婚照，其中一幅「新娘上樹」更令人大開眼界。
Andy上個月買咗部iPad，用嚟睇囝囝嘅相片冧到爆，佢話囝囝叫郭晉熹，英文名叫Archie，改呢個英文名背後有段古。話說囝囝出世時，第一個動作就係打噴嚏，噴嚏同Archie發音相似，所以叫做Archie，認真搞笑！
至於曾智雄部iPad就配咗個潮人牛仔褲品牌ed hardy製造嘅iPad機套保護。佢又係讚iPad好用，講講吓仲展示同太太喺新疆拍攝嘅結婚相，幸福滿瀉。其中兩張相好特別，一張喺河邊取景，另一張就見到新娘子躺臥樹上，智雄就喺樹下凝望太太，甜蜜到極。不過，新娘上樹難度都幾高，智雄就爆料話：「咪係我抱佢上樹囉！」
