政情：唐媽媽笑盧奕基戴過期襟章
政改方案卒之通過，煲呔曾嘅「起錨」爛騷亦終告落幕，不過，唔少曾班子嘅問責官員至今仍然戴住個「起錨」襟章，問你死未！尋日喺一個頒獎禮上，保安局局長政治助理盧奕基同政務司司長嘅媽媽唐尤淑圻都獲邀做主禮嘉賓，唐媽媽一到場即刻指住盧奕基個心口笑。睇真啲，原來笑緊盧政助仲戴住個「起錨」襟章。
盧政助聽到唐媽媽咁講，即時話「起錨」未完架，政府會繼續「起錨」向前行。事後再問多次盧政助點解仲戴住個襟章，係唔係因為有指示唔可以除住呢？盧政助即時話唔關事，只因為佢係問責班子一分子，所以要戴住保持團結喎。
不過，唔係個個問責團隊成員都好似佢咁睇噃。以環境局局長邱騰華為例，佢尋日出席公開活動時，就已經無戴「起錨」襟章，不過就畀個科大學生捉住投訴港府環保政策唔掂，又批政府建築物勁嘥電，呢位學生仲將自己搜集到嘅證據畀局長睇，搞到局長即時面黑黑。說到底，依家應唔應該除低個「起錨」襟章好呢？天曉得！真係要問過煲呔曾至知喇。