政情：建制派抵制飯局

李國寶做東食檸檬

比較精明嘅朋友就會發現，平時嘅建制派飯局，都係建制派嘅中堅分子請客，離不開民建聯、經濟動力同金融服務界嘅金勞詹詹培忠，不過今次就破天荒由平時喺立法會「三點不露」嘅李國寶付鈔，可以話十年唔逢一閏。如果大家仲記得，之前兩次煲呔曾競選特首，李國寶無論人力定財力都大力支持佢，之後仲獲頒香港最高榮譽嘅大紫荊勳章，係名正言順嘅「曾朋友」，呢個飯局由佢畀錢有乜意味？大家諗吓啦！

你擺你嘅和頭酒，人哋受唔受就係另一回事；以前晚嘅形勢，相信就好唔樂觀，而且都係各有各嘅理由。冇出席嘅IT界代表譚偉豪（Samson）就話一早約咗人，所以缺席飯局。佢仲加多句話，大家一連三日喺立法會朝見口晚見面，其實有乜都傾晒喇，相信唔去都冇乜所謂。好嘢！

自由黨啱啱畀一朝得志嘅政制及內地事務局局長林瑞麟以「檸檬茶論」寸爆，前晚全部缺席。黨主席劉健儀（Miriam）話，前晚有個一定要去嘅酒會，撞期都冇辦法；而喺立法會狂數政府「有事鍾無艷，無事夏迎春」嘅匯賢智庫葉劉淑儀，前日中午政改一表決完，就飛咗去上海上堂，絕情向飯局講拜拜；工聯會亦只得黃國健做代表，專業會議據聞亦只見劉秀成及梁美芬。

其實之前一連三日嘅政改辯論，唔少建制派都發炮狂轟煲呔曾嘅起錨騷，狠批佢最後要靠中央打救，擺明集體向煲呔曾詐型，點知煲呔曾喺風頭火勢下仲唔識死，擺明攞架嚟丟，自取其辱！