英格蘭美國攜手出線

「三獅兵團」頭兩仗僅得兩分，要出線今戰幾乎非勝不可，卡比路棄用希斯基及艾朗連儂，改用迪科爾同朗尼打箭頭、占士米拿踢右中場。因為出線形勢不妙，英軍今仗極具戰意，13分鐘林柏特罰球遠射太正被門將接實，16分鐘朗尼禁區頂推橫起腳，亦省中敵衞僅得角球，之後泰利及格連莊臣先後攻門，亦無功而還。但23分鐘英軍終於有斬獲，占士米拿右路高波傳中，迪科爾快步楔位一腳抽入，英格蘭終於打開紀錄。之後英軍繼續壓住攻，但林柏特面對空門竟然射高，之後迪科爾、謝拉特連環快射，亦過不了斯軍門將十指關，半場英格蘭領先一球。

下半場雙方鬥攻快打快，英軍49分鐘幾乎拉開比數，朗尼沉底傳中迪科爾輕易射入，可惜朗尼越位在先慘食詐胡。轉頭斯軍箭頭路華高域於禁區來遲半步，未能頂中皮球。56分鐘，泰利接應角球勁頂被撲出，一分鐘後朗尼於無人看管之下抽射，竟然轟中門柱。67分鐘，英軍門前大混亂，斯軍三連射都被英軍後防奮不顧身擋出，最後「三獅兵團」有驚無險小勝一球。今仗卡比路從善如流，棄用頭兩仗表現不濟的希斯基及艾朗連儂，兩名「後備兵」即時交出表現，盡顯名帥本色；但「國家希望」朗尼演出仍有待改善，今仗雖然多次起腳更曾射中柱，但下半場顯得好急躁，最終被卡帥換走。

英格蘭門將占士睇到迪科爾入波，極為興奮。 （Getty Images圖片）	放大圖片	放大圖片

當路雲絕殺阿爾及利亞

另一場美國九十分鐘同阿爾及利亞悶鬥悶，高潮於補時階段出現，美國打反擊門前一片混亂，最終隊長當路雲一箭定江山，美國戲劇性贏1比0。如果美國今仗打和就出局，好彩有當路雲打救球隊，最後英、美同得5分，得失球差亦一樣，但美國得球較多由出局變首名出線，認真精彩！

放大圖片

放大圖片

■本報綜合報道