中環出更：徐立之戴樣辦煲呔撐港大
早前香港大學喺馬場搞咗個校友私人聚會，卓妮見到校長徐立之打咗個好搶眼嘅紅色煲呔，同佢平時穿戴領呔嘅形象好唔同。卓妮仔細一看，呔面印有港大校徽。徐立之笑謂，此紅色煲呔係獨一無二嘅絕版珍藏。
有錢都買唔到
原來幾年前港大訂造一批印有校徽嘅煲呔，打算用嚟做紀念品送畀人。當時有紅色同綠色兩種樣辦以供選擇，結果綠色勝出。至於條紅色落選樣辦就落入徐立之手中，成為絕版靚呔，所以有錢都買唔到㗎！
咁特別嘅煲呔，梗要揀特別嘅場合佩戴。好似當日不止係港大校友會聚餐，第七場賽事亦都係「港大校友會盃」，徐立之就靠條煲呔靚絕全場啦！佢又笑謂，疲累時都會打條絕版煲呔，因紅色可顯得個人精神啲。