中環出更：田二少燭光P慶結婚36年

卅六係一個迷人嘅數字，用嚟形容女士身材，煞食！卅六歲嘅女人，風韻猶存。G2000老闆田北辰同太太梁錦儀剛剛度過咗卅六周年結婚紀念。佢哋上周二晚喺星級嘅跑馬地黃泥涌道嘅Amigo餐廳舉行慶祝派對，大哥田北俊臨走前突然喺Benz座駕後座攞份巨型禮物賀細佬，大玩驚喜！

二少揀正喺結婚周年正日擺燭光晚餐，請嚟近廿位親友同佢共進法國大餐。除大哥田北俊同大嫂外，富士攝影器材有限公司主席孫大倫都係座上客之一。二少穿上自家品牌G2000令立立銀色西裝，太太就揀咗一條湖水綠圓點背心裙襯Chanel手袋，加埋右手嘅巨鑽，貴氣十足。

燭光晚餐喺晚上八點開始，二少帶備多支私伙法國紅酒宴客，眾人歡聚至夜晚十一點半散席，二少親自出門吻別賓客，田太手執四朵紅玫瑰，一副幸福小女人模樣。卓妮趁機八吓二少送乜禮物氹太太，佢答：「我哋講心唔講金嘅！」咁多年來夫妻相處之道係尊重同忍讓，聽起嚟好簡單。

當賓客陸續上車返歸，原來好戲在後頭。一直扮酷冇送禮嘅田少，突然叫餐廳職員幫佢喺車廂後座攞出一盒大禮，塞喺細佬懷中，二少非常感動，露出執到寶嘅笑容，不過份禮睇落非常重手，二少揪住都感到有啲吃力。

卓妮事後八到，呢份神秘大禮原來係紅酒醒酒器，設計精巧如一件藝術品。二少一直嫌家中嘅醒酒器太重，手柄「唔好揸」，哥哥送嘅醒酒器既輕巧又富品味，哥哥知道晒佢心意，好醒。