奧當跌Watt慘成箭靶
NBA總決賽今日早上進行第五回合，湖人主將奧當喺對塞爾特人嘅前四回合一直發揮唔到水準，表現被球迷炮轟，佢歸咎於自己感冒未清，影響場上發揮。積遜教練暗示若奧當狀態未有改善，將改派兩名大後備祖殊包維及邁賓加上陣。（無綫高清翡翠台、有線165台及now 670周一早上8時直播）
身價高達3,300萬美元嘅奧當，去年暑假先同湖人簽咗四年合約，但佢喺總決賽四場平均僅得7.5分、5.3個籃板及1次助攻，三項數據都創下三輪季後賽以來最差成績，難怪佢成為湖人球迷嘅眾矢之的。
今仗唔掂 勢失正選
事實上，湖人喺總決賽過於倚賴加素及高比拜仁進攻，令塞爾特人防守時易於防範，而作為第三得分點嘅奧當，無論進攻同防守都表現懶懶閒，故「禪師」積遜已向奧當施壓，話今場再交唔到貨嘅話，就會畀機會兩名大後備祖殊包維及邁賓加。
奧當解釋表現不濟嘅原因：「我一直患感冒，所以近幾場發揮唔到最佳水準，我相信打埋今場返洛杉磯之後，就可回復最佳狀態。」
此外，塞爾特人兩名內線球員柏堅斯及拉舒華萊士，喺季後賽已累積六次技術犯規，若再攞技術犯規嘅話，將會被罰停賽。不過兩人均表示唔會影響表現，落到場一樣搏到盡。
■本報綜合報道