政情：林依麗唔知醒失場
商台被指見錢開眼出賣廣播時段畀政黨做節目，惹來各方大抽政治油水，之不過抽水都要抽得夠水平至得。立法會補選九龍西候選人林依麗，有樣學樣購買商台廣播時段，聲稱要「反映有關業主立案法團貪污及迫害部分小業主」問題，仲通知記者尋日中午到商台採訪佢洽談購買時段，點知佢失場，原來佢喺屋企瞓緊覺未起身。
話說班記者中午十二點抵達廣播道商台，等咗十五分鐘都未見人，於是打電話搵林依麗，有把疑似外傭嘅聲音接電話，話林依麗仲未起身，當記者表明來意之後，工人立即叫佢起身，當事人最後搞到一點鐘先至抵達商台。
九龍西「精英盡出」，除咗林依麗外，仲有黃毓民、張錦雄、黃永志、白韻琹、郭兆明、佘繼泉及蔣世昌，其中白韻琹嘅愛郎、立法會議員謝偉俊尋日着咗件助選Ｔ恤去立法會開會，佢話一共製作咗二百件，佢律師樓嘅職員都有份。