政情：鄧國斌減薪慢半拍
審計署署長鄧國斌平日嘅工作係查帳、核數，不過如果有日佢要查番自己盤數，可能會發現自身嘅薪酬調整，仲混亂過好多公營機構嘅糊塗帳！
政府上周五刊憲，交代審計署署長鄧國斌由去年四月一日起月薪加至十九萬四千三百五十元，但根據《公職人員薪酬調整條例》第七條，佢又自本年一月一日要減薪至十八萬三千八百九十五元，經過一輪加減後，埋單計數，政府仲差鄧國斌近六萬元人工。不過，鄧國斌透露，成件事最弔詭嘅係原來佢直至本年三月都仲係出緊原本嗰份糧，即係十八萬六千九百元。
鄧國斌嘅薪酬一向跟隨公務員調整，行會去年十月一口氣通過三份職系架構檢討報告書，令三成二高級公務員可以加薪百分之三至五，追溯期由去年四月起開始。去年尾立法會又通過高級公務員根據薪酬趨勢調查結果，全港一萬八千多名首長級及高級公務員由今年一月一日起減薪百分之五點三八。
依家鄧國斌調薪慢半拍，減人工足足遲大隊四個月，歸根究柢又係煲呔曾做事慢手慢腳所致。因為根據《核數條例》第4A條，審計署署長調整薪金要由特首下令刊憲交代，但係政府拖到上個月尾先刊憲，咪搞到鄧國斌份糧唔上唔落囉！