中環出更：城中名人熱捧意國男高音

$3380門票火速售罄

Bocelli前晚喺會展嘅表演，捧場粉絲星光熠熠，本港政經名人都因為佢而聚首一堂，難怪有份協辦做搞手嘅香江文化交流基金會主席江素惠（Susie）都話，最貴嘅三千三百八十蚊門券一早清晒，反而最平嘅六百八十蚊門券就去得相對慢啲，不過最後都全場滿座，證明難得來港獻唱嘅Bocelli，號召力十足。

田少同查懋成夫婦都直認係Bocelli粉絲，田少不嬲都有聽開，查太就仲誇張，由Bocelli一出道就熱捧，查生仲收集晒佢所有唱片添。之前Bocelli喺世博演唱，畀人話佢咪嘴假唱，今次唔係第一次睇Bocelli表演嘅蘇澤光話，佢唔會去睇呢啲新聞。Susie亦一樣力撐話可能當時個咪唔係對正佢把口，所以轉播時先有呢個錯覺。

至於Bocelli本身，演出當然非常專業，完全冇因為咪嘴傳聞而影響心情，佢唱出多首歌劇好似《茶花女》等名曲，又同女高音Sarah Brightman合唱，壓軸就同澳洲歌手Delta Goodrem一齊大唱經典情歌。不過台下嘅粉絲個個都陶醉喺佢嘅歌聲之中，完場時都無人肯起身。Bocelli惟有encore，唱到第三首encore之作《Time To Say Goodbye》嗰陣，觀眾都依然唔肯say goodbye，結果要四度encore先可以落幕。

《Time To Say Goodbye》係江素惠十幾年前第一首聽Bocelli嘅作品，依家再聽都依然好感動。	新鴻基地產副主席郭炳聯（左）同太太拍拖到場。	旅發局主席田北俊（右）同太太拍拖聽歌，但就口密唔講儲咗幾多張Bocelli嘅唱片。

卓妮