政情：立會拒絕葉約德要求
星展銀行行政總裁葉約德本月十六日就會應立法會嘅傳召上立法會，成為第一位出席立法會研究雷曼事宜小組委員會聆訊嘅銀行大班，作為銀行界第一人，葉約德要求小組改變慣例，喺三個鐘嘅聆訊期間小休兩次而唔係慣例嘅一次。小組委員會公事公辦，要求佢如果有特別生理需要，唔該出示醫生紙證明。
葉約德周五會帶埋兩位女將一齊出席聆訊，即三位都係女將。聆訊由九點半直踩到中午十二點半，按照慣例，通常到十一點左右會休息十五分鐘。不過前排葉約德去信小組委員會，話三個鐘頭嘅聆訊好「extensive」同「intensive」，即係資料又多又密集，擔心個半鐘先抖一次會不利證人嘅身體狀況，所以要求小組委員會可以改為一個鐘就休息一次。
有小組委員知道葉約德嘅要求之後，向我哋講笑話可能係啲銀行大班驚咗上立法會，所以至提出個咁嘅要求，但係佢哋話除非葉約德交張醫生紙證明真係有咁嘅需要，否則只能一切照舊。