政情：楊哲安成功洗底

自覺撞板 不再狂言

Jeremy早前因為約一班喺facebook批評過佢嘅「八十後」青年食飯不遂，喺facebook爆咗句：「搞對抗的人士要如何才會接受我的邀請，坐下一起溝通？」被網民圍剿。有人話佢標籤異見人士，有人就寸佢約女仔出街失敗都冇理由話人哋「搞對抗」。事隔幾個月，一班「八十後」終於應邀同佢食餐飯「溝通溝通」，聽講班「八十後」同佢食完飯後，對佢大為改觀。

聽知情人士講，原來Jeremy約佢哋食飯足足約咗八個月先約到，唔怪得之Jeremy喺facebook打嗰句嘢咁有求愛不遂feel啦。當日應邀嘅有六個人，包括青年聯舍、網台「青台」同青年組織「Ytalk!」嘅中堅分子，佢哋討論嘅話題上至青年住屋同就業問題，下至性教育同「八十後」文化，總之乜都講一餐。「八十後」出名敢言，見到Jeremy真人點會唔笑佢facebook單嘢吖。有出席飯局嘅人士就透露，Jeremy一聽到人提番起佢嘅facebook狂言，就表現得尷尷尬尬，仲話都知自己撞咗板，以後會小心啲，唔會再亂講嘢喎。

有「八十後」就話，同Jeremy食完飯後，覺得佢幾誠懇去了解群眾心聲，都唔係好似外間所言嘅「二世祖」咁衰啫。佢仲話雖然Jeremy嘅政治技巧有進步嘅空間，但算係比其他政助主動，「好多官都識用facebook同人溝通，但佢真係示範到facebook可以點用囉。」

呢個飯局成功為Jeremy洗底，當然一定要再encore啦，Jeremy話到明下次要嗌埋勞工及福利局政治助理莫宜端嚟添。Jeremy仲喺飯局度好開心咁話太太張燊悅再度懷孕，睇嚟餐飯真係公事私事無所不談喎。