政情：醫生捉吳文華去割眼皮
立法會秘書長吳文華（Pauline）最近睇嚟成個精神咗，原來佢早前做咗一個小手術，將右眼下垂嘅眼皮割走，成個人睇嚟都後生晒！Pauline唔係因為貪靚先去割眼皮，其實佢係畀醫生林順潮急call返醫院做手術。
Pauline一直都係工作狂，佢喺回歸前做臨時立法會秘書，長駐深圳日夜趕工，香港回歸咗，佢最後就搞到右眼患上虹膜炎，本來去咗北京準備到清華大學受訓，亦要急急返香港睇醫生。虹膜炎可以致盲，當時Pauline隻眼畀現時係全國人大嘅眼醫林順潮醫好咗，Pauline做嘢好勤力，不過睇醫生做定期檢查就懶啲嘞。
醫生喺電視上見到佢出過事嘅右眼肌肉下垂，眼球因為要適應啲肌肉，亦都開始有啲歪斜，結果「通緝」佢去做手術，話咁易手術成功，Pauline亦都靚番晒！