中環出更：Tim霍潮着Gucci膠底鞋

卓妮早前喺武術總會酒會見到Tim，佢上身着咗好正式嘅西裝，仲打埋呔，但下身就着咗條牛仔褲色調嘅斜布褲，再襯對黑色真皮嘅Gucci輕便鞋，夠「潮」之餘又不失嘉賓嘅禮儀。

原來Tim啱啱落機趕至酒會，咁着的確係百搭之選。佢話好鍾意對鞋，形容鞋底好似軍靴咁襟着，又夠晒舒適，所以一次過掃咗好多對。其實呢款輕便鞋係Gucci嘅經典設計，鞋底係用橡膠而唔係真皮，所以質地好柔軟舒適。

講起衣着品味，Tim長年不變嘅髮型同埋闊邊粗框眼鏡都好經典，幾乎已成為佢嘅個人標誌。卓妮問佢點解唔轉吓款，Tim一時唔知點答，笑謂佢向後梳嘅髮型係「五十年不變」，眼鏡都係一樣，經常一次過配咗好多副。佢笑謂依家潮流興「保育」意識，佢咪啱晒呢個潮流囉。

卓妮