中環出更：蔡繼有新校舍開幕場面墟冚
「福布斯」富豪榜榜上有名嘅中總會長蔡冠深（Jonathan），尋日有新Baby誕生。蔡氏家族捐款興建嘅保良局蔡繼有學校新校舍開幕，蔡氏家族空群出動迎接「新寶貝」。Jonathan如今名成利就未忘本，為感激已故父親「海產大王」蔡繼有用心栽培，瞓身辦學，望薪火相傳下去。
卓妮尋日到訪合共花費三億元興建嘅新校舍，認真嚇一跳，設施美輪美奐，有份主禮嘅港大校長徐立之都話正。
Jonathan將校園內三幢大樓以媽媽蔡杜佩卿、祖父蔡朝勳及祖母鄭二命名。蔡老太有個孝順仔，全日笑唔停，拉埋六名子女喺新校舍內左逛右逛。蔡家人強馬壯，包括大仔冠欽、二女紹霞、三仔冠深、五女小蘭、六女少萍及細仔冠明，四女少娟有事在身嚟唔到。大哥冠欽話，兄弟姐妹各有份工，七弟冠明就喺家族旗下嘅滙富金融做執董。
蔡冠深細仔迎賓夠醒神
Jonathan有五名子女，蔡太關穎琴尋日拉埋子女撐場，Jonathan細仔原來喺蔡繼有學校讀小四，尋日着上小童軍制服，企喺大門口迎賓，以行動為爸爸打氣。
蔡繼有學校名氣響噹噹，Jonathan話辦學原則係做到最Top，唔想有負爸爸之名，故不惜重金禮聘最頂尖老師，音樂科更有著名大提琴家李垂誼去年起擔任該校嘅音樂顧問。
卓妮