政情：大輝潮人總會飲春茗
立法會議員林大輝原本尋晚應該出發到日本，為十日後出戰日本高松宮紀念盃嘅愛駒「極奇妙」打氣，點知尋晚喺新界潮人總會春茗見到佢，唔通佢喺日本問多啦Ａ夢借咗「隨意門」返嚟？非也！大輝根本無去日本，事關今次出賽嘅除咗「極奇妙」之外，仲有馬王「蓮華生輝」，不過「蓮華生輝」出發前絞腸痧要做手術，出唔到賽，大輝一直都係諗住陪太子出戰，依家「馬王」唔去馬，佢話自己隻愛駒只係「妹仔」，去嚟都無意思，所以決定同「蓮華生輝」共同進退，唔去日本出賽。
不過唔去都有得着，事關大輝係新界潮人總會發起人之一，依家唔使缺席，可以同班潮州兄弟飲酒聯誼，令佢仲開心。大輝仲講笑話「極奇妙」已經七歲仔，家陣唔使舟車勞頓，連愛駒都心情靚靚，講唔定喺香港會跑番幾場頭馬返嚟威威添！當然今次唔去日本，起碼都可以幫大輝慳番二、三十萬。