離島區議會主席林偉強早前爆出懷疑侵吞坪洲鄉事委員會近十萬元租金津貼嘅醜聞後，除咗喺月頭開咗個記者會澄清外，就從此銷聲匿迹。雖然林偉強喺記者會度聲稱，會主動聯絡鄉議局主席劉皇發，解釋番件事嘅來龍去脈，但據悉發叔到前日都仲未有佢嘅消息。尋日林偉強原定出席西貢蠔涌車公古廟嘅重修開光儀式，點知佢都係唔見影。
尋日嘅活動原定於早上十一點開始，點知儀式進行到一半，主禮嘉賓林偉強仍然唔見人。儀式負責人打電話畀佢，想查詢佢嘅下落，佢都冇覆機。我哋尋日下晝再嘗試聯絡佢，但就發現佢連手機都熄埋添，連留口訊嘅機會都冇，睇嚟佢真係疊埋心水玩失蹤嘞。
查實林偉強依家遇上麻煩，想匿埋喺屋企唔見人，可以理解。但作為堂堂一個鄉議局副主席兼離島區議會主席，好似小學生咁玩失蹤，就未免太不負責任嘞。下次佢乾脆唔接受人邀請仲好啦！