中環耳目：陳克勤推介Naozen和風定食
日本菜喺香港好受歡迎，立法會議員陳克勤（Gary）都係日本菜嘅忠實擁躉。上星期四，卓妮約咗朋友喺中環威靈頓街嘅日本餐廳Naozen食午飯，見到Gary喺度歎餐廳好受歡迎嘅和風定食，Gary勁讚好好味，仲話好似食緊小型懷石料理添！
材料新鮮 價錢合理
原來呢度係Gary最愛食肆之一，已經幫襯咗五、六年。佢鍾意餐廳嘅價錢合理，食物賣相精緻，最緊要係好好味。佢經常自己嚟幫襯，有時同朋友飯敍都會揀呢度。當日就算立法會冇會開，佢都專登嚟祭五臟廟。Gary極力推介餐廳嘅和風定食同埋魚生飯，當日佢叫嘅和風定食，有齊前菜、刺身、煮物、燒物、蒸蛋，可謂包羅萬有，難怪Gary盛讚好似歎緊小型懷石料理。
Naozen係中環人醫肚嘅熱點，佢哋以高級刺身作主打，材料新鮮而且價錢合理，最啱忙碌嘅中環上班一族忙裏偷閒歎餐飽啦！