政情：高達「假大胸」嚇親林鄭
平日充斥白領一族嘅中環，尋日竟然有一大班穿上奇裝異服嘅人士喺度賽跑！香港大型慈善盛事「鼠戰中環」尋日載譽encore，主辦單位今年更以「生日」為主題，慶祝活動五周年，吸引各方企業團體組織共四十八隊參賽。有人將成個壽包放上頭，有人就扮孖寶兄弟，唔少企業高層同議員更親自落場跑，辣「慶」全場氣氛，成條遮打道猶如提早慶祝萬聖節！
鼠戰中環籌240萬善款
「鼠戰中環」由置地主辦，今年籌得嘅二百四十幾萬善款將全數撥予慈善團體思健，於中港兩地推廣精神健康。置地公司總裁彭耀佳同怡和常務董事兼思健主席黎定基尋日為活動主禮後，兩人更親自落場參與「鼠戰接力賽」。
白鴿黨兩名立會議員李永達同涂謹申尋日亦有參賽，雖然佢哋嘅蝙蝠俠同羅賓造型早已曝光，但尋日二人「游走」中環時依然嚇親唔少人，高達嘅蝙蝠俠「胸肌」仲一度嚇親主禮嘉賓發展局局長林鄭月娥，令平日「好打得」嘅佢都忍唔住捉住高達影相。阿涂太太蘇麗芬尋日亦喺現場主理公關工作，雖然涂太唔多願同老公合照，但就不時遞紙巾畀佢抹汗，又幫佢綁鞋帶同影相，體貼非常。