政情：人大滯京獲VIP款待
近年港區人大開完會由北京返港都零舍多阻滯，上年佢哋坐國航機返港，飛機降落時畀怪風吹離原定降落跑道，好彩最後大家都有驚無險。今年嘅人大代表雖然就冇再經歷九霄驚魂，但就畀場大風雪搞到佢哋滯留北京機場。
一行卅幾人嘅港區人大代表，原定乘搭尋日晏晝三點半嘅飛機返港，點知撞正大風雪，焗住改搭五點四十分班機。人大方面好識做，喺北京機場安排咗一間ＶＩＰ房，安頓呢班尊貴嘅人大代表。聽講呢間ＶＩＰ房有梳化、電視同獨立廁所，仲有無限嘅雜誌同茶水點心供應添，不過如果要「柯打」特別飲品，各位貴賓就要自掏腰包嘞。
有人大代表瞄過張價目表，發現呢間ＶＩＰ房一個鐘嘅租金要三千八百蚊人民幣，班機準時喺五點幾起飛，佢哋喺入面hea咗兩個鐘，差唔多要八千蚊。人大之一嘅蔡素玉話，一班人大都對間房嘅設備相當滿意，完全冇怨言。