護老院差劣社署零監管

年逾八旬的梁母患有末期腸癌，去年十月中入住黃大仙一間護老院，未幾即發現院舍設備裝置不善，「個救命鐘裝喺床頭，高到要反轉身遞高手至㩒到，叫阿媽點㩒？」但令梁最不滿乃職員未有按醫生指示餵服藥物，「阿媽要飲嗎啡水止痛，但夜晚冇人餵佢，辛苦到晚晚瞓唔到！」梁向院方投訴，對方竟指「飲咁多冇益」，梁母最終住院不足十日便離世，事後梁女士才發現該院曾被檢控派錯藥，質疑社署對院舍監管，透明度亦欠奉。

無獨有偶，黃先生安排母親入住同樣位於黃大仙區的護老院，亦發現問題多多。黃指母親患有糖尿病，並因中風至四肢癱瘓，需接受全天候護理，故特別囑咐職員須每小時替母親翻身，「未畀錢就乜都應承，畀咗錢就話之你，結果住咗唔夠兩個月阿媽就生晒壓瘡，仲要細菌感染過埋身。」黃事後又揭發該院因遲向社署遞交資料而延誤購買氣墊床申請，「佢哋（院舍）賴醫院未畀資料，其實係佢哋冇交表！」

共用沖涼刷欠衞生

至於遭踢爆「逼阿婆食屎」的護老院，則再爆出「共用沖涼刷」個案。陳小姐（化名）指早前往該院探望七旬友人時，發現衞生情況惡劣，「我個朋友話沖涼個個都用埋同一個刷，刷下呢個又刷嗰個，好污糟！估唔到爆咗食屎單嘢之後，間嘢嘅質素都仲係咁差。」

黃大仙區議會地區設施管理委員會委員黃逸旭批評社署懲罰過輕，難收阻嚇作用，「證實院舍有錯都淨係得口頭提醒、勸喻，邊有阻嚇力？」黃促社署加強監管及突擊巡查次數，「出咗事、人都過埋身至嚟調查，對家人、對死者都唔公平。監管得嚴啲問題就自然少啲！」

權益會促設扣分制

老人權益促進會副主席陳鑑銘建議引入院舍扣分停牌制，「每次證實院舍有錯就扣分」，當扣分至某一水平即判罰停牌或其他處分，以收阻嚇之效。

立法會福利事務委員會委員潘佩璆指，獎罰制度及投訴機制有助改善院舍服務質素，倘個案涉及刑事成分或虐老，當局便應提出檢控，以儆效尤。

記者 莫麗珊