中環出更：CY「3‧8」認同太太掃貨利經濟
喺呢個愈嚟愈講女性平權嘅年代，女性地位愈嚟愈高，男士都要忌佢哋三分。適逢尋日係三八婦女節，婦女事務委員會搞咗個午餐講座，唔單止邀請得恒生銀行女大班梁高美懿同長實企業公司秘書楊逸芝等商界女強人出席分享，仲請埋行政會議召集人梁振英（CY）同埋港大首席副校長王于漸兩個大男人，出嚟講吓佢哋喺呢個女性話事嘅年代點生存添。
話說尋日午餐會嘅討論題目係「婦女參與是經濟發展的關鍵」，CY甫出場，就話呢個題目唔使點傾，事關佢喺屋企對呢句說話體會好深喎。CY解釋，佢同太太共用一個信用卡戶口，每個月當佢收到張咁乸脷嘅月結單，正準備投訴時，佢太太就會爆出一句「婦女參與係經濟發展嘅關鍵」，令到一直咁注重本港經濟發展嘅CY想駁嘴還擊都唔得。
CY又話，自己同好多男士一樣，都係「二五仔」，成日都星期二飛去國外做嘢，星期五先飛返嚟香港陪家人，好彩得到太太照顧家庭，仲話如果冇咗一班偉大嘅婦女，好多「二五仔」都生存唔到喎。總之口乖到女人們無話可說。
港大要增設化妝間
港大首席副校長王于漸亦都認為依家女性基本上已經撐起晒成個天，地位絕對不容忽視。而喺後年開始，香港就會推行三三四學制，王于漸預計會有愈嚟愈多女仔入大學，仲話會叮囑學校嘅總務處起定多啲女性化妝間，如果唔係就會畀人批評港大就三三四學制準備得唔足喎。
同場嘅港大校董劉麥嘉軒亦都話依家做女人愈嚟愈多責任，又要照顧屋企，又要出外工作，所以已經同老公中大校長劉遵義講明，希望下世大家可以男女掉轉，咁佢哋下世都可以繼續做夫妻。劉太畫公仔畫出腸，面對屋企嘅家頭細務，劉校長應該識做啦！
卓妮