中環出更：乖女送贈心口針梁太醒神
唔少政商界女強人都喜歡喺套裝上扣上一個心口針，貪佢低調得嚟又夠醒神。尋日恒生女大班梁高美懿（Margaret）出席婦女事務委員會搞嘅午餐會時，就戴住一個鑽石心口針，雖然普通粗戴，鑽石唔算好大粒，但心口針呈波浪形，釀工細緻。細問之下，先知原來心口針係Margaret愛女送畀佢嘅禮物。
月尾暢遊意大利
Margaret話，上年同囡囡一齊去珠寶行時見到呢個心口針，當時囡囡知道佢鍾意，就二話不說畀錢買咗嚟孝敬媽咪，皆因囡囡啱啱出咗花紅喎。問到牌子同價錢，Margaret就唔肯透露，但就話係囡囡負擔得到佢嘅數目喎！
Margaret又同我哋講，佢一向都盡量喺外國買衫，唔係因為特別鍾情外國牌子，而係好怕同人撞衫。嚟緊月尾佢就會同先生及囡囡一齊去意大利玩番十日，Margaret笑笑口咁話，此行主要都係去shopping，但都會把握呢個機會大歎最愛嘅意大利菜咁話。
卓妮