本文重點
「包裝大師」馬主、理文造紙主席李運強同埋公子李文斌（Edmond）尋日現身馬場，雖然隻馬最終冇跑出，但兩父子一樣咁開心。老竇睇好今年市道，仲話七月有「好好嘅消息」公布。阿仔就自爆老婆何芷韻懷上孖胎，預產期大約六月，跑完場馬後仲急急腳返屋企睇老婆添！
社交界早前已傳出Edmond太太夢熊有兆，尋日我哋見到Edmond梗要恭喜佢。佢喜形於色，話太太情況好好，仲自爆今次「打孖」嚟添，真係可喜可賀！佢已經安排老婆大人喺嘉諾撒醫院迎接新生命，至於係男定女就保持神秘，話遲啲生咗會話畀大家知㗎啦！
李運強話七月有好消息
理文造紙股價近排勁升，李運強笑不攏嘴，佢好有信心咁叫大家留意七月份，屆時會有好好嘅消息公布。七月係理文公布全年業績嘅時間，舊年公司雖然賺三億幾港元，但大幅倒退八成，今年李運強咁有信心，梗有大反彈啦！