【本報綜合報道】雷霆球星杜蘭特瘋狂得分停不了，昨對木狼一仗又攻入32分，不但協助雷霆作客以109:107贏波，取得「9連勝」，個人來說更連續28場得分超過25+，距離「波神」米高佐敦於86至87年球季連續40場得分25+的紀錄，又近一步。

只係第三年打NBA的杜蘭特，已經超越艾佛遜成為當今球員「冧巴溫」，打破後者於01年所創、連續27場射入25+嘅紀錄。強如「大帝」勒邦占士，喺08年都只係連續21場做到呢個成績。

勇士教練教壞細路

雷霆教練史葛布魯克斯，盛讚杜蘭特最大優點是勤力：「『KD』一直默默耕耘，準備工夫做得好足，他每日都不停練習射波、翻睇錄影帶，不停鞭策自己，他有今日的成績，我一點也不意外。」

另外，勇士「非常教練」尼爾遜昨帶領球隊主場以108:104擊敗鷹隊後，自爆竟然帶旗下的年輕球員飲酒及賭錢，他說自己與史堤芬居里、莫奴同托里夫等球員一齊去蒲吧，並藉此與球員「溝通」，同球員傾防守同點樣打波。之後尼爾遜仲與他們玩輪盤，並且成為大贏家。